Kapreolo Nachwuchs beginnt das Trainingslager im Waadtland

Am 9ni simmer in Dietlike abgfahre. Nach ere Fahrt mit gueter Stimmig dur die halb Schwiiz simmer endlich im Zollikofenwald acho. Dänn häts gheisse: umzieh und ab in Wald. Scho vor em Zmittag hets en Schlaufe-OL gäh. Wo mer erschöpft und hungrig zum zweite Mal acho sind, hämmer öpis gässe. Sobald mir alli wieder gschtärcht gsi sind, isch es au scho losgange mit em zweite Training für de Tag. Zerscht simmer im ne Gebiet gsi, wo mer händ müse Pöschte sueche und ihre Standort erchäne. De Ort hämmer euis dänn müesse merke und de Leiter säge. Wämmer das erfolgrich absolviert hät, hät mer dörfe losränne uf en churze, aber schöne Lauf dur de Wald. Grundsätzlich isch es a dem Namiitag vor allem um Höhelinie gange. Dänn gaht d Fahrt wiiter an Genfersee i das wunderschöne Lagerhuus. Det hämmer euis iipufft und händ nachher en feine Znacht gnosse. Nach em Abwäsche isch es losgange mit em Lagercup, wo mer hüt händ müesse Lieder rate vo de Lager CD. Die Lieder hämmer scho uf de Hifahrt i de Büssli gloset. Jetzt gömmer voller Vorfreud uf morn go schlafe.

Vo Julia B., Sira und Nora M.